2Cor 8 | MCQ | STEP | 'Enajihuna'e Masatonia puni sosia vaji Godoni maiji vwihani'ina ka'ene mihaji nú ja 'warave hehuna'e ura renúu.

2 Corinthians 8

Nimai Roji'inapo Teamana'eje Hura Hara Vajihunijina

1 'Enajihuna'e Masatonia puni sosia vaji Godoni maiji vwihani'ina ka'ene mihaji nú ja 'warave hehuna'e ura renúu. 2 'Ene pu sisea 'ee ahija piunivara vo pu ni'ima'ura'e temarasahe 'ee uneunecha pa'arena'e paraniana vo mavajihi'i nahunijara ura rena paraniana. 3 'Enajihuna'e na ja nahama 'waravujaho pu areri vajihuna ho pavajihunijaho paka'avara kaivo pu puni ura ijino asisame kahaho vajihara. 4 'Ene pu ea ka'ene akuavi'inijihi ni'aji'irono ura renaume 'ejahúe puni pwinana'e re'avarono jarirume 'waruvara. 5 'Ene ikaho núra ichá'ina'e vwihaji'i hijuja'ina pana kaivo Godira ura renuja'ina'e pu maraku'ijaho puni hia Natohwi jihuni ija tahi irechamareja iji'a nuni ija taha roara. 6 'Enavo nú Taitasi 'ejahaume hura nimarako aneja venana. 'Ena'omo hura kú'o joni vaji kaukara mavarasa'ina kaho vena va'e urisahuna. 7 Ja niho'o uneunecha mamaaru vejura areri nimaaroa 'ee ira arira'e 'warame 'ee henaka rukine 'ee niho'o nimaa nimaa'e vene oja mihuni 'unama ka'ene nú joni vaji aneja vejajaho veje rausa'amana. 'Ene kaukara mamaakaho 'u'o veje rausaha para'amana. 8 Na ikaho 'ejahie 'warahuna pana kaivo na ja ea 'aho'a nimaa nimaijino oja mihu ho pana ijí ki'irono 'waravuta. 9 Ijihuni maijaho núni Natohwa Jesu Kerisora maiji vwihanúajaho ja nihena kavara. Hu niho'o arerina kaivo Hu roe jonijihuna'e pa'ana'e renana. 'Ejakame Hura pa'ana renana vajijino jara roe areri rena parani'amarono avanana. 10 'Ene vajihuri 'unamijaho nuni vwiha ichá'ina ka'ene ni'ajihunijaho ike 'waravu. 'Ene juara pina ka'ene nipa'arenajaho ja amuraru pavajihara kaivo 'u'o ija'ina vehuna ura renaara. 11 'Enakaivo ijí 'u'o temarasahi'i aneja vene vejaja'ina'e vena va'e pa'are'avara. 'Ene uneunecha ichá'ina'e ja areri vajihuni ja'ina'e vaji'avara. 12 Ijihuna'e ja vajihuna'e amairiara'avajaho ijaho ea irara hununa'a areri navuja'ina'e vaji'amana kaivo hununa'a ija'ina pa'ajaho pavajihuna. 13 'Enajihuna'e ja maho'o vají parave pu hami hi'eje ja sisei hihuna na parone 'waravu kaivo ahume areri renahuna'e 'waravu. 14 'Ene ike vea vutuakaho jara asisame huri vaji'avajara pura pivusahujija ni'ajihuna. 'Ene pura asisame huri vajihujara 'u'o jara pivusa'avajaho ni'ajihuna. 'Ejakame ijara areri rehuna. 15 'Ene ika'ina'e vejara.

Ea irara niho'o mapoka'e eiriajaho nijara areri renana. 'Ejume ea ka'ene mapoka paeiriajaho hu 'u'o nijara areri renana 'úmana.

Taitasi 'Ee Huni Napuhijijihipuni Vu'a

16 'Enakaivo Godi teimani 'wavu. Hura Taitasi oni oja vaji vwiha nikwisu'ina ka'ene nara jona vwihaju ja'ina'e huni vaja ranamana. 17 Ijihuni maijaho hu núra raka ka'ene jarivajiru panimaa venana kaivo hura huni ura ijino teama'eme joni vu'ana. 18 'Ene nú vwea pina ka'ene huni pinana ike vu'a maa maiu'ina ikehuni sosia vaji 'wama apene ojujaho ranavu'e hu hu'úmo vu'u. 19 'Ene ijiru pana kaivo sosi hu nú pu'úmo 'uraha ohuna'e iji pijahara. Ike kaukara maiu'inakaho núra 'ajohi'i Natohwiji ta'arohe 'ee jara ni'ajarahuniji najahe avaju. 20 'Ene hami akuavi'i ike swara mapoka mamaa ka'ene núra 'ajo'avarono vajúhajaho 'ajoha. 'Ejakame ea pina panamuhe 'waruhuna. 21 Ijihuni maijaho nú niho'o iraka ka'ene aririjihuni hura veju. 'Ene Natohwi jihuni una'eru pana kaivo ema puni una'a 'u'o hura hami veju. 22 'Ena'omo nú núni vwea pu pu'úmo ranavu'e vu'u. Nú hu vena kavajaho hu uneunecha mapoka vajijaho hu ea nimaa ura reji'ina'e kavara. 'Enakaivo iviamaa hu majano ura rena paranu. Ijihuni maijaho hu ni'ima'ura ja nimaa vetiu. 23 'Ene Taitasina'ijaho hu nuni napure 'ee nú hu'úmo joni vaji kaukara veji'ina. 'Enakaivo vwehu núpuna'ijaho pu sosi puni ona'e 'eke ojura 'ee pu ea ka'ene veju'e Kerisoho teamavi'inijina. 24 'Enajihuna'e jara vwehu núna ikihija'e oja mihujaho samaumaa sosia puni una'i naja'avara. 'Ene irakijihuna'e núra ja ta'arorahu jihuni maijaho pu ka'avara.